Боловсролын салбарын төсвийн шинэчлэлийн хүрээнд "Нэг хүүхдийг сургах хувьсах зардлын шинэчлэл" хэлэлцүүлэг Новотел зочид буудалд өнөөдөр боллоо. 

Энэ үеэр Боловсрол, Шинжлэх Ухааны сайд Л.Энх-Амгалан хувьсах зардлын шинэчлэлийн талаар доорх мэдээллийг өгөв.

Тэрбээр "2024 онд боловсролын салбарын төсөв 4.2 их наяд төгрөг болж дотоодын нийт бүтээгдэхүүний таван хувьд хүрсэн. Тус төсөвт нэг хүүхдийг сургах хувьсах зардлын шинэчлэл багтаж байгаа.

Өмнө нь нэг хүүхдийг сургаж буй хувьсах зардал нь байгууллагыг санхүүжүүлдэг тогтолцоо байсан. Үүнд тодорхой үр дүн, сурлагын ахиц, сургуулийн цэцэрлэгийн орчны ялгааг арилгах санхүүгийн тогтолцоо байгаагүй.

Хувьсах зардлыг нэг байгууллагын цахилгаан дулааны зардал, багшийн цалин гэж ойлгодог байсан.

Харин энэ жилээс эхэлж нэг хүүхдийн хувьсах зардлыг анги бүрээр нь тооцохоор болсон. Анги бүрд үзэж буй хичээлийн агуулга, орчин өөр учраас индексжүүлэх санхүүгийн шинэ тогтолцоонд орж байна" гэв.