Засгийн газар ХНХЯ, Боомтын хөгжил хариуцсан шинэ сайд нараа өнгөрсөн баасан гарагт томилов. Энэ үеэр Ерөнхий сайд Л.Оюун-Эрдэнэ УИХ-ын гишүүдийн асуултад хариулсан юм. Тэрээр “Цар тахлын үед эдийн засаг-4.7 хувиар буурсан бол одоо 4.0 хувийн өсөлтэй байна. Өрийн дарамтад орж, дефолт зарлах хэмжээнд тулсан байв. Экспорт сайжирч, улсын төсөв ашигтай болж байна. Энэ сэргэлтээ хадгалж чадвал оны эцэст улсын төсвийн ашиг нэг их наяд төгрөгт хүрэх, эдийн засгийн өсөлт 5-6 хувь болно. Энэхүү давсан орлогыг юунд, хэрхэн зарцуулах вэ гэдгийг Улсын Их Хуралтай хамтран шийдвэрлэнэ. Энэ мөнгийг хүүхдийн мөнгөнд зарцуулах уу, бүтээн байгуулалтад хуваарилах уу, цалин нэмэх үү гэдгээ шийднэ. Эдийн засагт эхний эерэг үзүүлэлтүүд гарч байна.” гэв.

Улсын төсвийн орлого нэг их наяд төгрөгөөр давсан удаа байхгүй. Улсын төсвийн орлого дутсан үед л төсвийг тодотгодог тул энэ оны улсын төсвийг тодотгохгүй гэж Эдийн засаг, хөгжлийн сайд Ч.Хүрэлбаатар өнөөдөр мэдэгдэв.          

Улсын нэгдсэн төсвийн нийт орлого, тусламжийн хэмжээ энэ оны эхний хоёр сарын урьдчилсан гүйцэтгэлээр 3.0 их наяд төгрөг болжээ.