Олон улсын хурал хийх байгууламж бүхий бүтээн байгуулалтын асуудлаар БОАЖ-ын сайд Б.Бат-Эрдэнэ Засгийн газрын бүрэн эрхт төлөөлөгч, Хөшигийн хөндийн бүтээн байгуулалтын асуудал хариуцсан захиргааны дарга Д.Оюунхорол болон албаны хүмүүстэй мэдээлэл солилцох уулзалт хийлээ.

Монгол Улс 2026 онд НҮБ-ын Цөлжилттэй тэмцэх Конвенцийн талуудын 17 дугаар бага хурал - COP17 болох ба уг арга хэмжээний бэлтгэл ажил болгож тус байгууламжийг барих аж.

Уулзалтын эхэнд Засгийн газрын бүрэн эрхт төлөөлөгч, Хөшигийн хөндийн бүтээн байгуулалтын асуудал хариуцсан захиргааны дарга Д.Оюунхорол “НҮБ -ын олон Улсын хурал хийхэд 1000 хүний суудалтай 2 танхим, 200-300 хүн хурал хийх хүчин чадалтай 10 танхим байх шаардлагатай ба одоогийн байдлаар энэ хэмжээний байгууламж Монгол Улсад байхгүй юм. Иймд уг хурлыг угтаж олон Улсын стандартад нийцсэн байгууламжийг Хөшигийн хөндийн эдийн засгийн чөлөөт бүсэд байгуулах боломжтой ” гэв.

Өмнөх НҮБ-ын Цөлжилттэй тэмцэх Конвенцийн талуудын бага хурал СОР13 - 2017 онд БНХАУ, Ордос Канбаши хотод болсон ба ингэхдээ 1300 орчим оролцогч, СОР14 - 2019 онд БНЭУ, Шинэ Дэли хотод болсон ба 6000 орчим оролцогч, COP15 - 2022 онд Кот-д Ивуар Улсын Абижан хотод болсон ба уг хуралд 7000 орчим хүн оролцжээ.

Уг хурлыг зохион байгуулснаар Монгол Улсын байгаль орчны бодлого, үйл ажиллагаа хэрхэн хэрэгжүүлж, тулгамдсан асуудлаа яаж шийддэгийг танилцуулах, бодлогын дэмжлэг авах боломж нээгдэнэ. Мөн байгаль орчны бохирдол, эсвэл уур амьсгалын өөрчлөлтөд хамгийн их нөлөөлж буй Улс орнууд тодорхой хөрөнгө оруулалтыг үүрэг амлалтаараа хийдэг ба бид эдгээрээс хөрөнгө босгож, асуудлаа шийдэх боломж нээгдэх юм.

Мөн Монгол Улсаа гаднын Улс оронд сурталчлан таниулж, эдийн засаг, нийгмийн хөгжилтэй холбоотой асуудалд дэмжлэг авах, хамтран ажиллах, гадаад хамтын ажиллагааг гүнзгийрүүлэх ач холбогдолтой ажээ.

Одоогоор уг хуралд гаднын 180 гаруй орноос өндөр дээд хэмжээний зочид ирэх ба мөн холбогдох албаны 5000-7000төлөөлөгч Монгол Улсад ирэх төлөвтэй байна.

Эх сурвалж: БОАЖЯ