Монголбанкны Ерөнхий эдийн засагч Д.Ган-Очир “Эдийн засгийн сэргэлтийн өрхөд үзүүлэх нөлөө, анхаарах асуудал” сэдвээр мэдээлэл өгсөнн юм. Тус мэдээлэлд "Энэ оны хоёрдугаар улирлын байдлаар өрхийн дундаж орлого нь зарлагаасаа 200 мянган төгрөгөөр бага байв. Мөн бодит орлого сүүлийн гурван жилд буурсан үр дүн харагдаж байгаа юм. Засгийн газраас хэрэгжүүлж буй орлогын дахин хуваарилалт буюу төсвийн бодлогын үр нөлөөгөөр энэ оны III улиралд орлого зарлагын зөрүү 80 мянган төгрөг болж буурсан. Мөн бодит орлогыг хамгаалахад төсвийн бодлогын суваг үр нөлөөтэй ажилласан нь тоон мэдээллээс харагдаж байна.

Энэ оны байдлаар Монгол Улсад 980 мянган өрх байна. Сүүлийн нэг жилийн хугацаанд 2.1 сая төгрөгөөс дээш орлоготой өрхүүдийн эзлэх хувь 2020 оны байдлаар 27.5 хувь байсан бол 2023 оны III улирлын байдлаар 40.8 хувь болж өссөн. Ерөнхийдөө өрхүүд бага орлоготойгоос дундаж орлоготой руу, дунджаас өндөр орлоготой руу шилжиж байгаа нь сайн үр дүн болж байна.  

Орлого өндөр өрхүүд нийт өрхийн орлогын 40 хувийг тайлбарлаж байгаа бол орлого багатай өрхүүд нийт өрхийн орлогын  8 хувийг бүрдүүлж байна. Бага орлоготой өрхийн нийт орлогод тэтгэвэр, тэтгэмжийн эзлэх хувь 65 хувь хүртэл өндөр байгаа бол орлого өсөхийн хэрээр тэтгэвэр, тэтгэмжийн эзлэх хувь буурч, цалингийн орлого нэмэгддэг байна.

Эдийн засгийн хүртээмжтэй өсөлтийг илэрхийлэх хамгийн гол үзүүлэлт болох цалингийн орлогын ДНБ-д эзлэх хувь хэмжээ манай улсын хувьд 28 хувьтай байна. Энэ нь хөгжиж буй болон хөгжингүй орнуудын дундаж 40 хувиас харьцангуй бага байна.

Иргэдийн хадгаламж 2020-2023 оны III улирал хүртэлх хугацаанд 9.9 их наяд төгрөгөөс 13 их наяд төгрөгт хүрч өссөн байна. Үүнд 10 сая хүртэлх төгрөгийн хадгаламжийн дүн 15 хувьд хүрч, өсжээ. Үүнээс иргэдийн хэрэглээ болон хадгаламж барьцаалсан зээлийг хасвал 4.9 их наяд төгрөг байна.

Банкны салбарын нийт зээлийн үлдэгдлийн жилийн өсөлт 14 хувьтай байгаа бол хэрэглээний зээлийн өсөлт 35 хувь байна. Өрхийн орлого ба зарлагын зөрүү нь хэрэглээний зээлийг өсгөхөд нөлөөлдөг.

Цаашид бодит орлогыг хамгаалахын тулд Төв банкны хувьд инфляцыг 6+-2 нэгж хувийн түвшинд хүрэх хүртэл хатуу бодлогыг үргэлжлүүлэх шаардлагатай. Мөн макро зохистой бодлогын хүрээнд хэрэглээний зээлээс илүүтэй бизнесийн зээл олголтыг нэмэх шаардлагатай" гэжээ.