Энэ үеэр Асгат, Баянтэс, Тэс сумын нөхцөл байдалд газар дээр нь үнэлэлт дүгнэлт хийж, Асгат сумын ЗДТГ-т туулах чадвар сайтай автомашин олгохоор шийдвэрлэсэн бол Тэс суманд нөхцөл байдал хүндэрсэнтэй холбогдуулан Улсын нөөцөөс таван тонн түлш, 40 тонн хивэг тэжээл нэмэлтээр олгохоор боллоо. 

 

Мөн Тэс, Баянтэс, Баянхайрхан, Асгат, Түдэвтэй зэрэг сумын хэрэгцээний хивэг тэжээл, түлш, шатахуун, гурил будааг Арцсуурийн боомтоор оруулах боломжийг бүрдүүлж өгөх тухай орон нутгийн хүсэлтийг Шадар сайд ойрын хугацаанд шийдвэрлүүлэхэд анхаарч ажиллахаа илэрхийлэв. Арцсуурийн боомтыг байнгын ажиллагаатай болгосноор шатахуун, гурил, хивэг тэжээлийг хурдан шуурхай татан авах боломж бүрдэхээс гадна тээврийн зардлыг 2-3 дахин хэмнэх боломж бүрдэх юм.

Баянтэс сумын дунд сургуулийн барилга шатсантай холбогдуулан хохирлыг даруй арилгах тал дээр анхаарч ажиллахаа илэрхийлэв. Баянтэс, Тэс сумын нийт нутгаар хөр цасан бүрхүүл тогтож, гуу, жалга гэх мэт хунгарласан хэсгээрээ цасны зузаан 120-160 см байна. Энэ сарын 10-наас эрс хүйтэрч, шөнөдөө байнга 40-47 градус хүйтрэн мал бэлчээрт гарах боломжгүй болсноос гадна зам даваа хаагдаж малчид төвд хураасан өвсөө хотондоо татах аргагүйд хүрч, малаа тэжээлд оруулжээ.

Эх сурвалж: Засгийн газрын Хэвлэл мэдээлэл, олон нийттэй харилцах газар