Монгол-Японы бизнес форум энэ сарын 19-нд болох талаар Монгол-Японы Хүний нөөцийн хөгжлийн төвөөс мэдээллээ. Японы талаас 150 орчим, Монголын талаас 200 орчим зочид төлөөлөгч оролцох форум мэдээлэл, харилцаа холбоо, инновацын салбарт төвлөрч, хүнс, ХАА, хөнгөн үйлдвэрлэл, аялал жуулчлалын талаар хөндөн хэлэлцэнэ.

Мөн Японы олон улсын хамтын ажиллагааны Жайка байгууллага Монгол Улсад хэрэгжүүлж буй төсөл, хөтөлбөрийг нэгтгэн танилцуулж, МҮХАҮТ-аас Монгол Улсын бизнес орчны судалгаа, Монгол Улсаас Японд хийж буй экспорт, Японоос Монгол руу хийж буй импортын талаар тус тус мэдээлэх аж.

Түүнчилэн Монголын Кайзен холбооноос Монголын компаниуд дахь кайзен хөдөлгөөний талаар танилцуулах талаар зохион байгуулагч талаас мэдээллээ. Форумын зочдоор Засгийн газрын төлөөлөл, Нийслэлийн Засаг дарга Х.Нямбаатар, Япон Улсаас Монгол Улсад суугаа Онц бөгөөд Бүрэн Эрхт Элчин сайд Игавахара Масарү нар оролцоно.  

Монгол-Японы бизнес форумыг Монгол дахь Японы Худалдааны танхим, Японд сургууль төгсөгчдийн Жугамо нийгэмлэг, Монголын Кайзен холбоо, Монголын талаас Нийслэлийн Бизнес инновацын газар зэрэг хоёр талын төрийн болон төрийн бус байгууллагууд зохион байгуулж, хоёр улсын бизнес түншлэлийн томоохон үйл ажиллагаа болох аж.