Монголын ашигт малтмал баяжуулагчдын холбооноос хоёр жил тутам зохион байгуулж ирсэн “Эрдэс боловсруулалт-2024” олон улсын эрдэм шинжилгээ, онол практикийн бага хурал энэ сарын 25-нд болно.
 
Энэ удаагийн "Эрдэс боловсруулалт-2024" олон улсын хуралд уул уурхайн өндөр хөгжсөн Канад, Австрали, АНУ, БНХАУ тэргүүтэй орны судлаач, мэргэжилтнүүд оролцоно. Урьдчилсан байдлаар дотоод, гадаадын нийт 200 гаруй төлөөлөл нэгэн дор чуулахаар байна.
 
Ашигт малтмалыг баяжуулах, боловсруулах үйлдвэрлэлд хэрэглэж буй шинэ технологиудыг танилцуулах, практикт нэвтэрсэн дэвшилтэт техник технологи, программ хангамжуудыг нутагшуулах боломжийг эрэлхийлэх, харилцан мэдлэг, туршлага солилцох, эрдэс боловсруулалтын салбарын чиг хандлагыг тодорхойлоход хувь нэмрээ оруулах, технологи нийлүүлэгчид-үйлдвэрлэл эрхлэгчид-судалгаа шинжилгээний байгууллагуудын хамтын ажиллагааг хөгжүүлэхэд хурлын зорилго оршиж буй.
 
Долоо дахь удаагийн олон улсын хуралд эрдэс боловсруулалтын чиглэлээр үйл ажиллагаа явуулж буй аж ахуйн нэгжүүд, төр засгийн байгууллагууд, эрдэмтэн судлаачид, их дээд сургуулиуд, ханган нийлүүлэгчид, лабораториуд, зөвлөх үйлчилгээ үзүүлэгч байгууллагуудын төлөөллүүд оролцоно.

Тэд салбарын техник, технологийн шинэчлэл, баяжуулах үйлдвэрүүдийн сайн туршлага, хөдөлмөрийн аюулгүй байдал, туршилт судалгааны ажлын үр дүн, хууль эрхзүй, татвар зэрэг эрдэс боловсруулалтын салбарын асуудлаа хамтдаа хэлэлцэх юм.
 
“Эрдэс боловсруулалт-2024” олон улсын хурлын ерөнхий зохион байгуулагчаар Монголын ашигт малтмал баяжуулагчдын холбоо ажиллаж байна. Хурал Новотел зочид буудлын Хурлын танхимд зохион байгуулагдах юм.