Нийслэлийн Иргэдийн Төлөөлөгчдийн Хурал, Гамшгийн эрсдэлийг бууруулах нийслэлийн зөвлөлийн 2025 оны төлөвлөгөөний хэрэгжилтийг хангах ажлын хүрээнд НОБГ-аас “Дөрвөн асуудал-Нэг шийдэл” аяныг эхлүүллээ.

Тус аян хүний буруутай үйл ажиллагааны улмаас амь нас, өмч хөрөнгө, хүрээлэн буй орчинд хохирол учрах, автомашин техник өртөх эрсдэлийг бууруулах зорилготой. Аяны хүрээнд олон нийтийн үйл ажиллагаа, оролцоо, хандлагыг дээшлүүлж, эрсдэлийг бууруулах, урьдчилан сэргийлэх мэдлэг мэдээллийг олон нийтэд түгээж, гал унтраагуурын хэрэглээг хэвшүүлж, аюулгүй байдлыг хангах юм.

Нийслэлд сүүлийн дөрвөн жилд 6750 дуудлага бүртгэгдсэний улмаас 124 иргэн нас баржээ. Тэдний 80.6 хувийг насанд хүрэгсэд эзэлж байгаа бөгөөд гал түймрийн улмаас төрийн болон хувийн өмчид 22.7 тэрбум төгрөгийн хохирол учирсан байна. Түүнчлэн ой, хээрийн таван удаагийн түймэр гарсан бол шар өвсний 406 дуудлага бүртгэгдэж, 114 га талбай өртсөнөөр байгаль, экологид 39.5 сая төгрөгийн хохирол учирсан байна.

Түүнчлэн автомашин, автобус шатсан 502 дуудлага бүртгэгджээ. Үүнээс автобус 38,  суудлын автомашин 390, ачааны автомашин 55, хүнд механизм 19 шатсанаас үүдэн нэг  тэрбум төгрөгийн хохирол учирсан байна.