Цагаан сар бол монголчуудын хувьд хамгийн онцгой, чухал баяр. Энэ баяраар саар, муу зүйлийг ярих ёсгүй гэдэг.  Шинийн нэгэнд дараах зүйлсийг цээрлэдэг ёс байдаг байна. 

Энэ өдөр гол, горхи худаг булаг шандаас ус авахыг цээрлэнэ. 

• Хувин сав усаар дүүрэн бялхаж байх ёстой.

Үйл мэтгэх оёхдоо хуучин дээл хувцас эд нөхөхийг цээрлэ. 

• Шинээр оёдог. Энэ нь сайн сайхны билэгшээл болж урт удаан наслахын зөн.

Эд юм зээлээр өгөхийг цээрлэнэ.

• Учир нь гарзны үүд нээгдэж олзны үүд хаагдана. Бусдад өглөггүй, бусдаас авлагагүй байхыг хичээ.

Уйлах, хэрэлдэхийг цээрлэ. 

• Зөрчвөл жилийн турш хэрүүл шуугиан, зовлон үл тасарна.

Зуух, тулганы үнс хогоо гаргаж хаяхыг цээрлэ. 

• Шинэ он гарахаас өмнө гэр орон орчин тойрноо цэмцийтэл цэвэрлэж сайхан болгох.

Билэг дэмбэрэлгүй үгс хэлэх, мал нядлах, ан гөрөө хийж, араатан амьтны амь тасалбал үхэл хагацал нүүрлэнэ.

Шинэ сарын шинийн долоонд ах, дүү, амраг садан, айлд очиж золгохыг цээрлэнэ. 

• Эл өдрийг хар өдөр гэх тул ийнхүү цээрлэдэг авай.

Эхнэр нөхөр хоёр хоорондоо золгохыг цээрлэнэ. 

• Золговоос хагацаж сална. Хар элэгтэй болдог ажээ.

Архи ууж, агсам согтуу тавьж хөлчүүрхэх, шинэ сарын шүүс, идээ будаанд эзний зөвшөөрөлгүй хүрч самардах, базах зэрэг наад захын ёс жаягийг зөрчихийг цээрлэнэ.

Биедээ мэсний зүйл авч явахыг хориглоно. 

• Үл дагаваас дайн дажингийн нигууртай.