Нью-Йорк хотноо энэ сарын 10-21-нд болж буй НҮБ-ын Эдийн засаг, нийгмийн зөвлөлийн Эмэгтэйчүүдийн аж байдлын комисс (ЭАБК)-ын 69 дүгээр чуулганд Гэр бүл, хөдөлмөр, нийгмийн хамгааллын яамны Төрийн нарийн бичгийн дарга Л.Мөнхзул тэргүүтэй төлөөлөгчид оролцож байна. 

Энэ удаагийн чуулганд НҮБ-ын гишүүн 180 улсын төлөөлөгчид, тэдгээрийн дотор 140 гаруй өндөр түвшний төлөөлөгчид оролцож, 1995 оны Бээжингийн тунхаглал, Үйл ажиллагааны хөтөлбөр, НҮБ-ын Ерөнхий Ассамблейн 23 дугаар тусгай чуулганы төгсгөлийн баримт бичгийн хэрэгжилтийг “Тогтвортой хөгжлийн 2030 хөтөлбөр”-ийн жендэрийн тэгш байдал, эмэгтэйчүүдийг чадавхжуулах асуудлын хэрэгжилттэй уялдуулан, хэлэлцэж байна. Гэр бүл, хөдөлмөр, нийгмийн хамгааллын яамны Төрийн нарийн бичгийн дарга Л.Мөнхзул энэ сарын 13-нд тус чуулганы Ерөнхий хэлэлцүүлэгт үг хэлж, Монгол Улс сүүлийн 30 жилд жендэрийн тэгш байдлыг хангах, эмэгтэйчүүдийн эрхийг хангах чиглэлээр олсон ололт амжилт, үр дүнгээс танилцуулав. 

Тэрбээр хэлсэн үгэндээ төр, засгаас хууль, эрх зүйн орчныг байнга сайжруулж, улс төр, нийгэм, эдийн засаг, соёл зэрэг бүхий л салбарт эмэгтэйчүүдийн оролцоог дэмжиж, жендэрийн асуудал хариуцсан институцыг байгуулан бэхжүүлж, гэр бүлд ээлтэй, ажлын орчныг жендэрийн мэдрэмжтэй, ажил ба гэр бүлийн эрх зүйн зохицуулалтад шинэчлэлийн тэнцвэрийг хангах зорилгоор “Хөдөлмөрийн хууль”-д нэмэлт өөрчлөлт оруулсныг цохон тэмдэглэлээ. Цаашид эмэгтэйчүүдийн албан ёсны ажил эрхлэлт, орлого нэмэгдүүлэх, асрахуйн эдийн засгийг хөгжүүлэх, орон нутагт амьдарч буй эмэгтэйчүүдийн боловсрол, эрүүл мэндийн үйлчилгээ, ажлын байрыг нэмэгдүүлэх шаардлага тулгамдаж байгааг тэмдэглэв.  

Чуулганы үеэр Төрийн нарийн бичгийн дарга Л.Мөнхзул Монгол, Аргентин, Турк, Шинэ Зеланд Улс болон ЕХ-ноос хамтран зохион байгуулсан “Бээжин+30: Эмэгтэйчүүд, охидын эсрэг хүчирхийллийг устгах хариуцлагыг дээшлүүлэх асуудал” сэдэвт тусгай арга хэмжээ болон өндөр түвшний хэлэлцүүлэгт оролцож, эмэгтэйчүүд, охидын эсрэг хүчирхийллийг устгах, урьдчилан сэргийлэх чиглэлээр үндэсний түвшинд авч хэрэгжүүлж буй бодлого, арга хэмжээг танилцуулж, туршлага солилцов.   

Түүнчлэн чуулганд оролцож байгаа манай улсын төр, иргэний нийгэм, залуусын өргөн бүрэлдэхүүнтэй төлөөлөгчид Бээжингийн тунхаглал ба Үйл ажиллагааны хөтөлбөрийн хэрэгжилтийг дүгнэн хэлэлцсэн олон арга хэмжээнд оролцсоны дотор бэлгийн ба нөхөн үржихүйн эрүүл мэнд, цахим орчинд эмэгтэйчүүдийн эрхийг хамгаалах, уур амьсгалын өөрчлөлтийн үед эмэгтэйчүүдийг чадавхжуулах зэрэг асуудлаарх тусгай арга хэмжээнд идэвхтэй оролцлоо. ЭАБК-ын 69 дүгээр чуулганаар Дэлхийн эмэгтэйчүүдийн дөрөвдүгээр бага хурлын 30 жилийн ойд зориулсан Улс  төрийн тунхаглал болон ирэх жилүүдийн үйл ажиллагааны хөтөлбөрийн тухай тогтоол батлагдав.    

ЭАБК-ын 69 дүгээр чуулган энэ сарын 21-нийг хүртэл үргэлжилнэ.