Их Британи, Умард Ирландын Хаант Улсад Монгол Улсын Их Хурлын дарга Д.Амарбаясгаланг тэргүүтэй төлөөлөгчид албан ёсны айлчлал хийж байна. Тус улсын Окфорд хотноо ажиллах үеэр УИХ-ын дарга Монгол судлалын эрдэмтэдтэй уулзаж, тэдний судалгаа, тооцооллыг төрийн бодлого, шийдвэрт тусгах нь чухал ач холбогдолтой хэмээсэн.

Тэгвэл мөн үеэр Оксфордын их сургуулийн захирал Уильям Хейг, Газарзүй, байгаль орчнысургуулийн захирал, профессор Жайлс Вигс нар бараалхлаа. Боловсрол, судалгаагаараа тэргүүлэгч Окфордын их сургуульд гэхэд л сүүлийн 20 жилд манай улстай холбогдох судалгаанууд хуримтлагдсан гэх бөгөөд тус сургуулийн 160 дахь Ерөнхийлөгчөөр томилогдсон ноён Уильям Хейг (Лорд Хейг) нь 1989-2015 онд парламентын гишүүн, 1993-1995 онд Хөгжлийн бэрхшээлтэй хүмүүсийн асуудал хариуцсан сайд, 1997-2001 онд Консерватив намын дарга, 2005-2010 онд Консерватив намын дэд дарга, 2010-2014 онд Гадаад хэрэг, хамтын нөхөрлөл, хөгжлийн сайдаар ажилласан. Түүний хувьд Хөгжлийн бэрхшээлтэй хүмүүсийг ялгаварлан гадуурхахын эсрэг хуулийг боловсруулж, улмаар Британийн Хаанд албан ёсоор зөвлөгөө өгдөг Приви зөвлөлийн гишүүнээр томилогдсон эрхэм юм. Британийн Гадаад хэргийн сайдаар ажиллаж байх хугацаандаа НҮБ-ын дүрвэгчдийн асуудал эрхэлсэн тусгай элч Анжелиа Жоли-той хамтран Зэвсэгт мөргөлдөөний үед хүчирхийллээс урьдчилан сэргийлэх кампанит ажлыг санаачлан өрнүүлжээ. Улс төрийн албан тушаалаас буусныхаа дараа тэрбээр бизнес эрхлэх, сайн үйлсийн ажил хийх, ном зохиол бичихэд цаг хугацаагаа зарцуулах болсон бөгөөд Хааны уран зохиолын нийгэмлэгийн гишүүн болсон ажээ.