УИХ-ын чуулганы нэгдсэн хуралдаан эхэллээ. Хуралдаанаар ХХААХҮЯ-аас дэвшүүлсэн, үхэр сүргийг ээмэгжүүлэн бүртгэх саналыг хэлэлцэж байна. 

ХХААХҮ-ийн сайд Х.Болорчулуун дараах мэдээллийг өглөө:   

-Уругвай 5 сая хүн амтай. 13 сая үхэртэй улс. Бүх үхрээ ээмэгжүүлэн бүртгэж, махаа экспортолдог. БНХАУ далайгаар махаа  бусад улсад нийлүүлж байна. Бид үхрээ ээмэгжүүлбэл бусад улсын жишгээр махаа өндөр үнээр худалдах боломжтой. 100 суманд тарьж байна. Энэ жил ногоон тэжээл тариалалт өмнөх оныхоос 40 хувиар өссөн. Малчид, иргэд, ААН-үүд ногоон тэжээлийг идэвхтэй тарьж байна. Энэ санаачилгыг орон даяар өрнүүлэх боломжтой. Сүүлийн 12 жилд малчид тооны хойноос хэт их хөөцөлдсөн.

Хувийн компани Дарханы арьс ширний үйлдвэрийг босгохоор Хөгжлийн банкнаас зээл авсан. Гэвч зээлээ зориулалт бусаар зарцуулсан тул ажил саатсан. 2025 онд үйлдвэр ашиглалтад орно. Үйлдвэрийг төрийн мөнгөөр барихгүй, харин цэвэрлэх байгууламжийг л барина. Тэр хүртэл арьс ширийг чөлөөтэй худалдана. Экспортод ямар нэг хориг тогтоохгүй гэсэн Засгийн газрын тогтоол гарсан.      

Энэ онд манай яам нийт 50 тэрбум төгрөгийн хөнгөлөлттэй зээлийг мал аж хуй, хөдөө аж ахуйн салбарынханд олгоно. Үүнээс 19 тэрбум төгрөгийн зээлийг олгоод байна" гэв.

Зээл олголт ийм бага байгаад УИХ-ын гишүүд шүүмжлэлтэй хандав. УИХ-ын гишүүд Биокомбинатын үйлдвэрийн тоног төхөөрөмж, технологи хуучирсан тул анхаарахыг хүслээ. Мөн залуу малчдын халааг бэлдэх ямар ажил хийж байгааг, өвөлжилтийн бэлтгэл ажил, Дарханы арьс ширний үйлдвэр хэзээ ашиглалтад орох талаар салбарын сайдаас асуув.       

УИХ-ын гишүүн Б.Баярсайхан "Завханы иргэд хамгийн өндөр үнэтэй гурил иддэг. Өвөл -50 градус хүйтэрдэг тул өвөлжилтийн бэлтгэлийг танилцуулна уу. Дарханы арьс ширний үйлдвэр ашиглалтад орсноор малчдын орлого өснө. Малын өвчлөлийг бүрэн шийдэн үү? Монгол малын мах амттайг хөрш орнууд мэддэг, авах гэдэг ч бид тэдний стандартыг яагаад хангаж чадахгүй байна вэ?" гэв.