Цаг үеийн нөхцөл, байдалтай холбогдуулан УИХ-ын дарга Г.Занданшатар

-Сайд, дарга нар гал унтраах байдлаар ажиллахаа болих хэрэгтэй байна. Шатахууны нөөцтэй болох хэрэгтэйн. НИК-ийн нөөцийн савыг төмрийн хогонд гадагшаа зарчихсан, улсын стратегийн нөөцийн савтай байх хэрэгтэй. Үүнийг ярьж байгаад санхүүжүүлэх хэрэгтэй. Дундын, ойрын шийдлүүд хэрэгтэй байна. Газрын тосны үйлдвэрүүд яасан?

Үл үзэгдэгч хамаг бүхнийг зохицуулж байдаг. Гэхдээ бид энэ үл үзэгдэгчийг хэн гэдгийг мэдэж байгаа шүү дээ.

УИХ-ын гишүүн Д.Өнөрболор:

-Сүүлийн өдрүүдэд шатахуун, түлшний хомсдол, эрчим хүчний хязгаарлалт үүсэж байна. Энэ өнөөдөр үүссэн биш, сүүлийн 20-30 жил л ярьж байгаа асуудал шүү дээ. Эрчим хүчний шилжилт рүү нэн яаралтай, тооцоо судалгаатай, зоригтой шилжих шаардлага харагдлаа. Бид эрсдэлийг бууруулах менежмент, төлөвлөгөөтэй улс, орон болох шаардлагатай байна.

Хүйтний эрч өдрөөс өдөрт чангарч байгаа энэ үед эрчим хүч, түлшний доголдол үүсвэл яана вэ. Маш их гарз, хохирол үүсэх нь ээ. Хүнс, эрүүл аюулгүй байдал, тээвэр гээд тоолж баршгүй хэмжээний сөрөг нөлөөлөл үүсэхээр байна.

Цаашид цэргийн ажиллагаатай байгаа улс бидэнд эрчим хүч, шатахуун нийлүүлье гэсэн ч чадахгүй нөхцөл үүсвэл бид яах юм бэ?  Гэнэтийн болзошгүй зүйлд бэлтгэж, системийн доголдлоос сэргийлэхгүй бол хүний амь нас ч хохирч болзошгүй нөхцөл үүснэ.

Чуулганы эхэнд УИХ-ын гишүүн С.Ганбаатар үг хэлэх хүсэлт ирүүлжээ. Тэрбээр:

-Хэлэлцэх асуудалд оруулаасай гэж хүсэх зүйл байна. Ордны хаалганаас 50 метрийн цаана 6 сар сууж байгаа, Сүхбаатар аймгийн харьяат н.Энхцэцэг гэдэг хүн байх юм. Тэр төрийн буруутай үйл ажиллагаанаас болж хохирсон, би 6 сар автомашиндаа амьдарч байна гэнэ. Би яаж туслах вэ гэхэд яам, тамгын газар, агентлагаас нь ирж уулзаад өгөөсэй, би асуудлаа хэлж, ярьж шийдүүлмээр гэлээ.

Бид ард түмний төлөөлөл шүү дээ. УИХ-ыг ард түмэн сонгосон. Энэ хүний асуудлыг анхааралдаа авахыг холбогдох сайд, дарга нарт нь уламжилж өгөөсэй.

Хоёрдугаарт Н.Өнөрцэцэг сэтгүүлч өлсгөлөн зарлажээ. Сэтгүүлч, сайд хоёр хоорондоо үзэлцэнэ гэдэг бол буруу. Хүний эрхийн хууль тогтоомжийн хэрэгжилтийн талаар сонсгол хийж, үүнийг нэг талд нь шийдэхгүй бол нийгэм хоёр талцаж, ороо бусгаа боллоо.