Соёл, спорт, аялал жуулчлал, залуучуудын яам, НҮБ-ын Хүүхдийн Сан хамтын ажиллагааны хүрээнд “Гэр бүл-соёлын анхдагч орчин” хүүхэд, гэр бүлд чиглэсэн соёлын боловсрол олгох хөтөлбөрийг хоёр сарын турш амжилттай зохион байгуулж, Дэлхийн хүүхдийн өдөр хаалтаа хийлээ.
“ГЭР БҮЛ-СОЁЛЫН АНХДАГЧ ОРЧИН” соёлын боловсрол олгох хөтөлбөр нь Хүүхэд, гэр бүлд чиглэсэн соёлын боловсрол олгох олон талт хөтөлбөрүүд хэрэгжүүлж, хүүхдийн эрх, хөгжил, хүүхэд хүмүүжлийн эерэг аргын талаар ойлголт мэдээллийг нэмэгдүүлж, соёлын боловсролын сургалт, хөтөлбөрийг тогтмол хүргэх орон зайг шинээр бий болгож, нийгмийн соён гэгээрлийг дэмжих зорилготой байсан.
Үндэсний номын сан, Зайсан Хилл цогцолборт долоо хоног бүрийн амралтын өдрүүдэд соёл урлагийн нийт 9 байгууллага болох Байгалийн түүхийн музей, Г.Занабазарын нэрэмжит Дүрслэх урлагийн музей, Уран зургийн галерей, Хүүхэд, залуучуудын театр, Улсын Хүүхэлдэйн театр, Хүүхдийн төв номын сан, Монгол Улсын Үндэсний Номын сан, Монголын үндэсний музей, Чингис хаан үндэсний музейгээс явуулсан соёлын сургалт, хөтөлбөрт 12 000 гаруй хүн, үүнээс 8000 гаруй хүүхэд хамрагджээ. Тэд энэ хугацаанд гар урлал, оньсон тоглоом, уран зураг, музейн боловсрол болон хүүхдийн номын зохиолчидтой уулзах зэрэг арга хэмжээнд оролцжээ.
