Улаанбаатар төмөр зам 2024 онд ачаа тээврийг нэг сая тонноор нэмэгдүүлж 33.4 сая тонн ачаа тээвэрлэжээ. Мөн тээврийн тарифыг алдагдалгүй болгох ажлыг богино хугацаанд амжилттай хийсний үр дүнд 21 төрлийн ачааны хоёроос бусдыг алдагдалгүй тээвэрлэжээ.

Ачаа тээврийн хэмжээ өсөж, алдагдалгүй ажилласнаар төмөр замчдынхаа жилийн эцсийн үр дүнгийн шагналт цалинг 200 хувиар тооцож олгохоор шийдвэрлэснийг УБТЗ ХНН-ийн удирдлагууд жилийн эцсийн тайлангийн хурлын үеэр мэдэгджээ. 

Улаанбаатар төмөр зам ХНН нь 16 мянган ажилтантай бөгөөд байгууллагынхаа фэйсбүүк хуудаст нийтэлсэн энэхүү мэдээний дор "Нэг удаагийн шагнал яах вэ үндсэн цалингаа нэм. Төмөр зам дагуух өртөөний байр арчилгаа тордлогогүйгээс замчид болон тэдний хүүхдүүд хүйтэн, тав тухгүй байранд зутруу амьдарч байна" гэх мэт сэтгэгдлүүд бичсэн байв.