Энэ оны эхний таван сард манай улс 56300 ширхэг суудлын автомашин импортолж, өнгөрсөн оны мөн үетэй харьцуулахад 11.4 хувиар өсөв. Энэ нь 2023 оны мөн үеэс 2.3 дахин нэмэгдсэн дүн болохыг гаалийн байгууллага мэдээлжээ. Харин 11264 ширхэг ачааны автомашин худалдан авсан нь өмнөх оны мөн үеэс 5.1 хувиар буурчээ.
Сүүлийн жилүүдэд суудлын автомашины худалдан авалт нэмэгдэхийн хэрээр импортыг нэмэгдүүлэх гол хүчин болсоор байна. Импортын бүтцийг харвал, Японоос импортолсон барааны 80 гаруй хувийг суудлын автомашин эзэлж байгаа бол Хятадаас импортолсон барааны 9.9 хувийг ачааны автомашин, Оросоос импортолсон барааны 74.5 хувийг нефтийн бүтээгдэхүүн эзэлж байгаа юм.
