Засгийн газрын ээлжит хуралдаан үргэлжилж, хуралдаанаас гаргасан шийдвэрүүдийг танилцуулж байна.

Засгийн газрын 2025 оны 29 дүгээр тогтоолоор Хар тамхитай тэмцэх газрыг бие даасан байгууллага болгох судалгаа хийх үүрэг өгсөн. Мансууруулах эм, сэтгэцэд нөлөөт бодисын эргэлтэд хяналт тавих хууль, Эрүүгийн хууль болон бусад холбогдох хуульд нэмэлт, өөрчлөлт оруулах шаардлага үүсэж буй тул хууль эрх зүйн орчин бүрдэх хүртэл тус газрыг бие даасан алба болгохоор шийдвэрлэлээ.

Мөн Цагдаагийн төв байгууллагын харьяа алба болох “Мөрдөн байцаах алба”-ны нэрийг “Мөрдөн шалгах алба”, “Хэрэг бүртгэх алба”-ны нэрийг “Гэмт хэрэг, зөрчил шалгах алба” гэж өөрчилжээ.

Улсын хэмжээнд 2021-2025 оны эхний хагас жилд мансууруулах эм, сэтгэцэд нөлөөт бодистой холбоотой 1021 гэмт хэрэгт 987 иргэн холбогджээ. Энэ оны эхний хагас жилийн байдлаар 112 гэмт хэрэг бүртгэгдэж, 97 иргэн яллагдагчаар шалгагдсан нь өмнөх оны мөн үетэй харьцуулахад 4.5 хувиар өссөн байна.

Мансууруулах бодистой холбоотой гэмт хэрэгт холбогдогчдын 51 хувийг 13-25 насны хүүхэд, залуучууд эзэлж байна.