Орхон аймаг хотыг дахин хөгжүүлэх бодлогын хүрээнд энэ сарын 22-нд “Ногоон амины орон сууцны нээлттэй өдөрлөг”-ийг А.Амарын талбайд зохион байгуулах гэж байна.

Өдөрлөгийн зорилго нь эрчим хүчний хэмнэлттэй амины орон сууцны төслүүдийг нутагшуулах, үр нөлөө, ач холбогдлыг нь таниулах ажээ. Мөн амины орон сууц барихад зориулж ногоон технологийн шийдлийг иргэд, аж ахуйн нэгжид танилцуулах нээлттэй мэдээлэл өгөх юм.

Энэ үеэр эрчим хүчний хэмнэлттэй амины орон сууцны гүйцэтгэгчид, сэргээгдэх эрчим хүч үйлдвэрлэгч болон туслан гүйцэтгэгчид, ногоон зээл олгогч банк санхүүгийн байгууллагууд зэрэг 30 гаруй байгууллага оролцоно. Мөн Орхон аймгийн Баян-өндөр сумын Эрдэнэ багт барихаар төлөвлөж буй 60 айлын Эрчим хүчний хэмнэлттэй ногоон амины орон сууцны жишиг хотхоны танилцуулга хийгдэнэ. Түүнчлэн “Моод шинэчилгээ” нэвтрүүлгийн баг өдөрлөгийн үеэр сугалаат урамшуулал зарлаж ялагчийн гэр, амины сууцыг нь дулаан алдагдалгүй ногоон барилга болгон өөрчлөх ажээ.

Ерөнхий зохион байгуулагчаар аймгийн ИТХ, Засаг даргын Тамгын газар, Хот байгуулалт барилга захиалагчийн алба, “Монголын амины орон сууцны инновац хөгжлийн төв” ТББ хамтран ажиллаж байгаа юм. Өдөрлөгт ногоон орон сууцны чиглэлээр үйл ажиллагаа явуулдаг аж ахуйн нэгж байгууллагууд оролцоход нээлттэй гэдгийг зохион байгуулагчдын зүгээс хэлж байна.

Орхон аймаг хотыг дахин хөгжүүлэх бодлогын хүрээнд дахин төлөвлөлт, орлогод нийцсэн орон сууц, ногоон амины орон сууц- дулаан алдагдлыг бууруулах гэсэн томоохон гурван  төслийг амжилттай эхлүүлээд байгаа.

Тодруулбал хоёр байршилд ногоон амины орон сууц барихаар төлөвлөөд байгаа юм. Үүнд: Баян-Өндөр сумын Эрдэнэ багийн 6га талбайд 60 айл, Оюут багийн Сархиа уулын энгэрт 48га талбайд 300 айлын амины орон сууцны төслийг хэрэгжүүлнэ.

Орхон аймгийн мэдээллийн төв