Франц улсын “Орано групп”-тэй байгуулах хөрөнгө оруулалтын гэрээний төсөл боловсруулах үүрэг бүхий ажлын хэсэг “Орано групп”-ийн төлөөлөгчидтэй уулзжээ. Хууль зүй, дотоод хэргийн сайд Х.Нямбаатараар ахлуулсан тус ажлын хэсэг өнгөрсөн амралтын өдрүүдэд Дорноговь аймаг дахь Зөөвч-Овоо, Дулаан-Уулын уран олборлох уурхайн талбайд ажиллаж, үйлдвэрлэлийн явцтай танилцсан.

Ажлын хэсэг өчигдөр /2023.06.15/ хөрөнгө оруулагч талтай эхний уулзалтаа хийсэн байна. “Орано майнинг” ХХК-ийн Монгол дахь төлөөлөгч Оливиер Түмир Зөөвч-Овоо төслийн ТЭЗҮ-д оруулах нэмэлт тодотголыг дуусгасан, энэ сард багтаан уул уурхайн эрдэс баялгийн зөвлөлийн хурлаар орох товтойг онцлов.

Мөн тэрбээр “Бидний хамтран хэрэгжүүлэх төсөл 50 жилийн туршид үргэлжилнэ. Зөөвч-Овоо төсөл нь байгаль орчинд ээлтэй, хөрс эвдэхгүй цомхон уурхай байна. Монгол Улсын уул уурхайн салбарт шинэ технологи ч нэвтрүүлнэ. Тиймээс хоёр улс хамтран хариуцлагатай уул уурхайг хөгжүүлнэ гэдэгт итгэлтэй байна” гэжээ. Түүнчлэн хөрөнгө оруулалтын гэрээг 2023 онд үзэглэвэл 2024 онд хөрөнгө оруулалтыг шийдэж, бүтээн байгуулалтын ажлыг гүйцэтгээд 2028 оноос үндсэн олборлолтоо эхлүүлэх товтойг хэлсэн байна.

“Орано групп”-ийн зүгээс хөрөнгө оруулалтын гэрээний эхний загварыг:

• Хөрөнгө оруулалтын тодорхойлолт, хамгаалалт
• Эдийн засгийн орчны тогтвортой байдал
• Байгаль орчны хамгаалал ба бүс нутгийн хөгжил
• Санхүүгийн менежмент
• Хуулийн нэр томьёо ба нөхцөл гэсэн таван үндсэн бүлэгтэй байхаар төлөвлөснөө танилцуулжээ.

Монгол Улсын Засгийн газрын байгуулсан ажлын хэсгийн зүгээс талууд харилцан ашигтай байх зарчим баримталж байгаа бөгөөд энэ талаар Ажлын хэсгийн ахлагч, ХЗДХ-ийн сайд Х.Нямбаатар “Монголын Засгийн газрын зүгээс хөрөнгө оруулагчдын эрх зүйн орчныг боловсронгуй болгох, харилцан ашигтай хамтран ажиллах зарчим баримталж байгаа.

Бидний зүгээс “Орана групп”-тэй байгуулах гэрээний төсөлд няхуур хандана. Нэмэлт саналуудаа ч хэлнэ. Тухайлбал, монгол ажилчдыг мэргэшүүлэх, уурхай ажиллаж явцад ажилчдыг түр кэмпэд байрлуулах биш тухайн бүс нутгийн хөгжлийг дэмжиж орон сууц бүхий суурьшлын бүс байгуулж, гэр бүлтэй амьдрах орчин бүдүүлэх, говийн бүсийн экосистемийг алдагдуулалгүй байгаль орчны нөхөн сэргээлтэд онцгой анхаарах заалтуудыг тусгах саналтай байгаа” гэжээ.