Их Британи, Умард Ирландын Нэгдсэн Хаант Улсаас Монгол Улсад суух Онц бөгөөд Бүрэн эрхт Элчин сайдаар Фиона Блайт томилогдов.

Тэрбээр "Британи-Монгол Улсын хооронд дипломат харилцаа тогтоосны 60 жилийн ой тохиож буй энэ цаг үед Монголд ажиллах болсондоо баяртай байна. Манай хоёр улс худалдаа, хөрөнгө оруулалт, уур амьсгал, байгаль орчин, боловсрол зэрэг олон салбарт хамтран ажилладаг. Миний бие Монгол оронд ажиллаж амьдрах хугацаандаа олон газраар аялж, олон монгол иргэдтэй уулзахыг тэсэн ядан хүлээж байна" гэжээ.

Шинэ Элчин сайд энэ сарын 21-нд Гадаад харилцааны Төрийн нарийн бичгийн дарга Н.Анхбаярт Итгэмжлэх жуух бичгийн хуулбараа гардуулан өгсөн билээ.

Элчин сайд Фиона Блайт Их Британийн Засгийн газрын хэрэг эрхлэх газар, Үндэсний аюулгүй байдлын нарийн бичгийн даргын алба, Гадаад хэрэг, хамтын нөхөрлөлийн яам, НҮБ-ын дэргэд суугаа Британийн байнгын төлөөлөгчийн газар, Сомали дахь НҮБ-ын төлөөлөгчийн газарт тус тус ажиллаж байсан туршлагатай юм.