Толгойтын замыг Ард Аюушийн өргөн чөлөөтэй буюу Гэмтлийн эмнэлгийг Содон хороололтой холбох олон түвшний огтлолцлын авто зам, гүүрэн байгууламжийн ажлын газар чөлөөлөлт 95 хувьтай байгааг албаныхан мэдээллээ.

Улаанбаатар хотын хэвтээ чиглэлд зургаан эгнээ замыг ирэх оны зургаадугаар сард ашиглалтад оруулна. Энэ жил шороо, далан овоолгын ажлыг 70 хувьтай хийж дуусгах ёстой. Хучилтын ажлыг ирэх онд хийж дуусгахаар төлөвлөж байна.

Газар чөлөөлөлтийн ажил 2022 оноос хойш буюу нэг жил гаруйн хугацаанд үргэлжилсэн. Нийт 356 нэгж талбар өртөж байгаагаас одоогийн байдлаар 34 нэгж талбар үлдээд байна.

Тодруулбал аж ахуйн нэгж үйл ажиллагаа явуулдаг хэрнээ хувь хүний нэр дээр байдаг газрын зургаан иргэнтэй ойлголцож чадахгүй байгаа. Тогтоосон үнэлгээг хүлээн зөвшөөрөхгүй, 3-4 дахин их төлбөр нэхэмжилдэг. Үүнээс болж тус замын ажил саатсан.

Энэ зам хоногт 26-35 мянган автомашин нэвтрүүлэх хүчин чадалтай гол холбоос үндсэн зам болж байгаа. 13 байршилд авто зам, замын байгууламжийг өргөтгөн, шинэчилснээр замын сүлжээ 17.8 хувиар нэмэгдэнэ" гэлээ.

Өмнө нь тавьсан холбоос замыг үндсэн замтай холбох ажлыг хийж байгаа гэдгийг хэлж байв.

2022 он гарснаас хойш нийслэлд 671 нэгж талбар газар чөлөөлжээ. Энэ нь ойрын 10 жилд байгаагүй үзүүлэлт. Учир нь Улаанбаатар хот жилд 100 хүрэхгүй нэгж талбар чөлөөлдөг байсан. Мөн аж ахуйн нэгж нийгмийн хариуцлагаа ухамсарлан хамтарч ажиллаж байгаа тохиолдол олон байгааг албаныхан дурдаж байв.

Гэвч үнэлгээг хүлээн зөвшөөрөхгүй, хэд дахин өндөр үнэлгээ хэлж, бүтээн байгуулалтад хүндрэл учруулах нь бий. Иймээс иргэдэд хандаж бүтээн байгуулалтын газар чөлөөлөлтөд хамтран ажиллаж, уян хатан хандахыг хүссэн юм.

Авто замын түгжрэлийг бууруулах хүрээнд хийж буй 13 байршлын замын ажил 2023 онд 70 хувьтай хэрэгжиж, 2024 онд бүрэн дуусах юм байна.

Нийслэлийн Замын хөгжлийн газрын дарга Г.Баярсайхан "Гэмтлийн эмнэлгийг Содон хороололтой холбох авто зам нь зургаан эгнээ бөгөөд хоёр талдаа тойрогтой, гүүрэн гарцтай.

Замын ажлыг "Монгол зам групп” ХХК гүйцэтгэж буй. Ажил 2022 оны зургаадугаар сард эхэлсэн бөгөөд 2024 оны зургаадугаар сард дуусгахаар төлөвлөсөн. Энэхүү замыг ашиглалтад оруулснаар Энхтайваны өргөн чөлөөний замын ачааллыг 50 хувь бууруулна гэж тооцоолж байна.

Өнөөдрийн байдлаар хөрс хуулалтын ажил 10 хувьтай үргэлжилж буй. Энэ жил нийслэлд нийт 16 байршилд зам засвар, шинэчлэлийн ажил гүйцэтгэж байгаагаас тав нь ашиглалтад орсон. Үерийн улмаас замын ажил удааширч байна. Авто замын шинэчлэл, засварын ажлуудыг наймдугаар сарын 15-н гэхэд дуусгах төлөвлөгөөтэй ажиллаж байгаа" гэв.

Энэ жил дөрвөн байршилд гүүрэн байгууламж барьж буй. Эдгээрийг энэ онд бүрэн ашиглалтад оруулах юм. Мөн  түгжрэлийг бууруулах ажлын хүрээнд өдөрт 990 орчим автобус үйлчилгээнд явдаг байсныг 1,200 болгон нэмэгдүүлнэ.

Нийтийн тээврээр өдөрт 500 мянга орчим иргэн зорчиж байгаа бөгөөд үүнийг 700 мянга болгохоор төлөвлөжээ. Энэ хүрээнд шинээр нийтийн тээврийн чиглэл нэмж, мөн богино эргэлтийг бий болгохоос гадна автобуснуудыг бүрэн шинэчилж байгаа юм.

Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс