Нийслэлийн Онцгой байдлын газрын дарга, хурандаа А.Дашням тарваган тахал өвчнөөс учрах аюул болон урьдчилан сэргийлж хамтарсан хяналт шалгалтыг зохион байгуулахыг холбогдох албадад үүрэг болгов.

Үүссэн нөхцөл байдлын талаар тодруулахад:

• Иргэн Г /50 нас, эр/ тарваганы мах худалдан авч идэж тарваган тахал өвчний шинж тэмдэгтэй өвдсөн нь Зоонозын өвчин судлалын үндэсний төвийн наймдугаар сарын 08-ны өдрийн шинжилгээний хариугаар “Тарваган тахал өвчний гэдэсний хэлбэр” батлагдсан. Халдварт өвчин судлалын үндэсний төвд хэвтэн эмчлүүлж биеийн байдал хүндэвтэр, ойрын хавьтлын есөн хүнийг тогтоож хяналтад авсан. ЗӨСҮТ-өөс Шуурхай хариу арга хэмжээний 2 баг 3 техник хэрэгслийг голомт бүхий 5 газарт (айл өрх 3, амралтын газар 1, автомашин 1) нийт 385 мкв талбайд голомтын эцсийн халдваргүйжүүлэлтийг зохион байгуулсан байна.
• Баянгол дүүргийн 26 дугаар хороо Нарны хороололд 08 дугаар сарын 10-ны өдөр тарваган тахлын сэжигтэй тохиолдол бүртгэгдэж, Зоонозын өвчин судлалын үндэсний төвийн шинжилгээний хариугаар онош үгүйсгэгдсэн.

Иймд:

• Тахлын байгалийн голомттой буюу түүний зэргэлдээх нутагт байгаа хүн ам тарваган тахлаас урьдчилан сэргийлэх тарилга хийлгэх
• Тарваган тахал өвчнөөр өвчилсөн, түүнтэй төстэй өвчнөөр өвчилсөн хүнд ойртох, гэр байранд нь орох, эд юманд нь хүрэхийг цээрлэх
• Эмч, эмнэлгийн байгууллагын зөвлөгөөг биелүүлэх, хөл хорионы дэглэмийг чанд сахих
• Байгалийн голомтот нутагт зөвшөөрөлгүй агналт хийхгүй байх. Нохой буюу хавхаар тарвага агнахгүй байх. Үхсэн мэрэгчид хүрэхгүй байх
• Амралт, зугаалгаар явахдаа тарвага агнах, бусдаас тарваганы мах болон эрхтнийг худалдан авч хэрэглэхгүй байхыг Нийслэлийн Онцгой байдлын газраас онцгойлон анхааруулж, сэрэмжлүүлж байна