Голомт банк болон ШУА-ийн Археологийн хүрээлэн, Гандантэгчэнлин хийдийн Эрдэм соёлын хүрээлэн хамтран “Өв соёлын голомт” төслийн хүрээнд “Буддын шашин ба археологи” олон улсын эрдэм шинжилгээний хурлыг зохион байгууллаа. Энэ жил 3 дахь удаагаа зохион байгуулагдаж буй тус эрдэм шинжилгээний хуралд Монгол, ОХУ, Япон, БНСУ, БНХАУ-ыг төлөөлсөн 50 орчим олон улсын эрдэмтэн, судлаачид оролцож, бурхан шашны эд өлгийн зүйл, түүнд чиглэсэн археологийн судалгааны үр дүнгээ танилцуулж, хэлэлцлээ.
Монгол Улсын түүх соёлыг олон нийтэд таниулж, дэлхийд тамгалахад археологийн олдворууд чухал үүрэгтэй. Харин “Буддын шашин ба археологи” олон улсын эрдэм шинжилгээний хурал нь Монгол нутгаас олдсон эд олдворын зүйлийг олон улсад таниулах, үүгээр дамжуулан буддын шашин хийгээд төрт ёсны түүхийг үнэн зөвөөр бичиж үлдээх, цаашлаад шинжлэх ухааны салбарын олон улсын хамтын ажиллагааг шинэ түвшинд хүргэхэд чухал ач холбогдолтой.
Тус олон улсын эрдэм шинжилгээний хуралтай зэрэгцэн Гандантэгчэнлин хийдийн Батцагаан дуганд “Буддын шашин ба археологийн судалгаа” тусгай үзэсгэлэнг 1 сарын хугацаанд дэлгэж, “Өв соёлын голомт” төслийн хүрээнд олдсон археологийн олдворуудыг олон нийтэд нээлттэй танилцуулж байна. Тусгай үзэсгэлэнд Монгол нутагт хамаарах Буддын археологийн эд өлгийн зүйлс, хөшөө дурсгал зэрэг нийт 200 гаруй ховор олдвор дэлгэгдээд буй.
